Біздің жақта құстардың түр-түрі мекендейді. Кейбіреулері қыстауға қалса, қалғандары күн суыған кезде жылы жаққа ұшуға асығады. Көктем шығып, күн жылып, табиғат мамыржайланғанда құстар да біздің өлкеге орала бастайды. Мен бала кезімнен олардың топ-топ болып ұшқандарына қызыға қарайтынмын. Өздері аспанда бір пішінді мүсіндеп, айналамызға сұлулық силайтындай. Күзде "Құстар қайтіп барады" деп, жырлайтын қазақ халқы, жазғытұры "Алақай!" деп, қуанады. Сол себептен, құстардың оралғанын үлкен кісілер жақсылықтың белгісі, көктемнің символы деп біледі.